RUARTE Fest

Logo dos éxitos conseguidos na iniciativa RUARTE, do emprego de arte para a recuperación de espazos degradados e con excelentes murais pintados por artistas de renome nos barrios da nosa cidade; chegou a festa do arte no espazo público. Esta I Edición realizouse na contorna da zona peonil da rúa Orzán na Coruña, para reunir neste día festivo as propostas artísticas máis actuais da cidade herculina.

Nun só día as artistas interviñeron nos comercios do barrio, entre persianas, portas e paredes, a través de creacións pictóricas, substituíndo as pintadas por unha imaxe renovada, nunha xornada chea de creatividade que imprimiu un carácter único a certas rúas dun barrio tan vivo e particular como é o Orzán.

Podedes atopar as bases da I edición de Ruarte Fest aquí.

Os comercios ou comunidades que se apuntaron non tiveron que gastar nada pola decoración da súa persiana, cristais, portas ou muro. A cambio, cederon o espazo á artista que lle asigne a organización.

Buscáronse propostas innovadoras e variadas que reflictan a versatilidade do arte nas rúas. A convocatoria dirixiuse non só as artistas de arte urbana, senón a todo tipo de persoas creadoras cunha proposta apta e interesante para as rúas do barrio intervido.

Cada artista seleccionada recibiu un vale para produtos de pintura ( valorado nun máximo de 200€), que lle foi entregado previamente, e puido trocalo no establecemento Pinturas Proa, partner artístico deste evento. Optaron a un dos tres premios, outorgados por un xurado, formado por unha persoa da concellaría de Medio Ambiente do Concello da Coruña, un profesional do ámbito artístico, xunto con veciñas, veciños e comerciantes da zona.

/// DESCARGA AQUÍ AS BASES DA I EDICIÓN ///